Health Blog
子宮頸癌係少數可以透過定期篩查有效預防嘅癌症。唔同年齡組別有唔同嘅篩查建議，一文睇清幾時要做柏氏抹片、幾時可以改做 HPV 檢測。
25 至 29 歲：曾有性經驗嘅女性，建議連續 2 年接受子宮頸抹片檢查，若結果正常，其後可每 3 年檢查一次。
30 至 64 歲：可選擇每 3 年一次子宮頸抹片、每 5 年一次 HPV 檢測，或每 5 年一次 HPV 檢測加子宮頸抹片合併檢查。
65 歲或以上：如過去 10 年常規篩查結果正常，可考慮停止篩查；否則應諮詢醫生意見。
定期篩查可以喺癌前病變階段及早發現問題，治癒率極高。如你從未接受過篩查，歡迎預約醫生評估。
絕大部分子宮頸癌同持續感染高危型 HPV 病毒有關，但有啲生活習慣同背景因素會令風險增加。了解風險，先可以有效預防。
主要風險因素包括：多個性伴侶、過早開始性行為、長期服用避孕丸超過 5 年、多次生育或第一次懷孕年齡較輕、免疫能力減弱、吸煙，以及同時感染其他性傳播疾病。
好消息係，接種 HPV 疫苗加上定期篩查，可以大幅降低患上子宮頸癌嘅機會。本診所提供 HPV 疫苗注射及篩查服務，歡迎查詢。
乳房自我檢查係最簡單、最容易養成嘅健康習慣。每月一次，只需要幾分鐘，就可以及早察覺乳房嘅變化。
第一步「觀察」：企喺鏡前，觀察乳房外形、大小同皮膚有冇改變，例如凹陷、皺紋或發紅。
第二步「觸感」：用手指平面以打圈方式輕按整個乳房及腋下位置，感受有冇硬塊或增厚。
第三步「比較」：左右兩邊互相比較，並同上個月嘅狀態比較，留意有冇新出現嘅變化。
建議喺經期完結後幾日進行檢查。如發現任何異常，請盡快求醫作進一步評估。
乳癌早期未必有明顯病徵，但身體其實會發出訊號。認識常見症狀，及早求醫，治癒機會就大得多。
常見症狀包括：乳房出現硬塊、乳房皮膚皺紋或凹陷、乳房形狀改變、乳頭有分泌物、乳房持續不適或疼痛。
要留意嘅係，大部分乳房硬塊其實係良性，但任何新發現嘅硬塊都應該由醫生評估。本診所提供臨床檢查及轉介影像檢查服務。
大腸癌係香港常見癌症之一，但透過篩查可以喺未有症狀時發現瘜肉或早期病變。50 至 75 歲人士應該點樣揀篩查方法？
一般建議 50 至 75 歲人士選擇以下其中一種篩查方式：每 1 至 2 年一次大便隱血測試、每 5 年一次乙狀結腸鏡檢查，或每 10 年一次大腸鏡檢查。
有家族病史或其他高危因素嘅人士，可能需要更早開始或更頻密檢查，應諮詢醫生意見。及早切除瘜肉，可以有效阻止其演變成癌症。
大腸癌初期症狀好容易同一般腸胃不適混淆，好多人因此延誤診治。以下幾個警號，持續出現就要求醫。
需要留意嘅症狀包括：大便帶血或黏液、大便習慣改變（持續便秘或腹瀉）、大便後仍有便意、腹部不適或絞痛，以及原因不明嘅體重下降和疲倦。
呢啲症狀唔一定代表患癌，但持續超過兩星期就應該搵醫生檢查清楚。早期大腸癌嘅治癒率相當高，關鍵在於及早發現。
以上健康資訊由凝匯醫務整理，僅供參考，並不能取代專業醫療意見。如有疑問請向醫生查詢。
